Filmi “Rreze”, i realizuar sipas një flete të ditarit të famshëm të Rreze Abdullahut e me regji te Lorena Sopit, është fitues në “World Film Festival”, i zhvilluar nga data 01 – 30 dhjetor në New South Wales të Australisë.
Në kategorinë e filmit të shkurtër kanë qenë të nominuar katër filma; “Healers” – Francë, “Rreze”- Kosovë, “Yet Another Breakup” – Belgjikë, “Arrested Prisoner” – Brazil. Filmi “Rreze” nga Kosova, ka fituar çmimin kryesor në këtë kategori– Best Short Drama.
Filmi “Rreze”, i cili pati premierën ne Cannes Film Festival – Short Corner, ne muajin maj të këtij viti, deri tani ka qenë pjesë e pesëmbëdhjetë festivaleve ndërkombëtare dhe ka fituar pesë çmime. Filmi më i mirë europian – në Europa Film Festival në Barcelonë, Filmi më i mirë i luftës në Festivalin Movie Pro Screen në Los Angeles të ShBA-së, Award of Merit në Festivalin Best Shorts Competition – La Jolla, të ShBA-së, Merit Award në Canada Short Film Festival në Vancouver të Kanadasë, si dhe Best Drama Short në World Film Festival.
“Rreze” është prodhim i kompanisë AS Film Production nga Prishtina.
Në rolet kryesore Agron Shala, Glorioza Shala, Aurita Agushi, Beslidhje Bytyqi, Selman Lokaj, etj..
Source: Televizion